Apr 27, 2013

Reni no Mise 3 -تجربتي مع لصقات كرست لتبييض الأسنان-

السلام عليكم ورحمة الله وبركاته !
كيف حاالكم جميلاتي ؟ ^^
إن شاء الله تكونوا بخير وفي تمام الصحة والعافية!

أدري مستغربين وتسألوا نفسكم ،،
مو كأنوا ريني قالت حتكون سلسلة ريني نو ميسي شهرية؟ طيب فينها من زمان؟
حابة أقولكم إني غيرت رأيي تماما بخصوص السلسلة إنها تكون "شهرية" ،،
يعني ، بعض الأحيان يكون صعبة إني أستخدم شي وأكتب عنو وأنا لسة ما أخدت وقتي في تجربته ،
فما حأقدر أكتب عنو شي قبل ما أقتنع بيه ،، لأني بصراحة ما أعرف أعطي رأيي بخصوص شي إن ما قعدت أجربه فترة،
فقررت إنها تكون غير محددة!
يعني كل ما جبت شي وشفت نتايجه وعجبتني بإذن الله مارح أبخل برأيي عليكم ^^ عشان كدا خليكم قريبين راجعتلكم بكل شي إن شاء الله يعجبوكم ،،
أهاا إيوة صح ،، قرار تاني!
رح أتكلم في كل تدوينة عن منتج واحد فقط؟
لييييش؟؟!! @@
لأني بصراحة حسيت إنو لمن أتلكم عن كذا منتج في تدوينة وحدة في منتجات ما تاخد حقها :/
فحبيت إني أعطي كل منتج نفعني حقققه بتدوينة كاملة عنو يسير آخد راحتي وأشرح بالتفصيل الممل عنه،
مو أحسن كدا؟ :$
طبعاً أكيد رأيكم يهمني كمان! ^^

في التدوينة الجديدة دي من محل ريني حابة أتلكم عن تجربتي للصقات كرست لتبييض الأسنان من البداية للنهاية!
Crest Whiestripes

طبعاً أنا من زمان كنت بأقرا إعلانات للصقات هادي وكيف إنها صارت تجاري الليزر في تبييض الأسنان ،،
وطبعاً إستخدامها أسهل لأنو تقدري تعمليها وإنتي في بيتكم بدون ما تخرجي وتتبهدلي في غلبة مواعيد المستشفيات ،
والحلو كمان إن لمن قرأت ودورت أكثر لقيت أغلب الأمريكان عليها ،،
مافيها ضرر ع طبقة المينا بإذن الله ،، وآمنة جداً، وحتلاحظي فرق بعد أول،، والتبييض يستمر لمدة ١٨شهر تقريباً إن شاء الله،،
-طبعاً لمحبات القهوة والأشياء اللي ألوانها غامقة أو مصبوغة لازم تقللي مرة من الأشياء دي لأنها طبيعي ختخرب التبييض  حق أسنانك حتى لو عملتيه في عيادة-

وأشياء كتيرة غيرها حمستني أشتريها..
النوع اللي جربته أنا كان إسمه
Crest WhiteStrips -Intensive Professional Effects-



-الصور ليست من تصويري-

أشتريتها من متجر ع النت ،، سعرها ٢٧٠ ريال
تحتوي ع ٧ مغلفات كل مغلف جوته شريطين للتبييض ، واحد للفك العلوي والتاني للسفلي ،،
تحطيها لمدة ساعتين في اليوم لمدة ٧ أيام

في حاجة حابة أنوه قبل ما أكمل التجربة ،، لصقات كرست في منها كذا نوع ع حسب نوع أسنانك إذا كانت حساسة أو لا "و ع حسب مفعولها كمان؟" أهم شي إنك تشوفي النوع اللي يناسب أسنانك لحتى تحصلي ع نتائج أفضل بإذن الله ،،
"إذا ماكنتي عارفة أفضل إنك تسألي دكتورة أسنانك ع أفضل نوع ليكي إذا حابة عشان تطمني أكتر ^^"
غير كدا مدة إستخدامك للصقة يختلف من نوع للتاني ،، زي اللصقات اللي أستخدمتها أنا تحتاج تقعد ساعتين لمدة ٧ أيام، وفي أنواع تحتوي ع ١٤ مغلف تقريبا تستخدميها لمدة ٣٠ دقيقة في ١٤ يوم ،، يعني كل نوع وطريقة إستخدامه،،

طريقة الإستخدام:
تفتحي فمك قد ماتقدري وتحاولي تنشفي أسنانك بمنديل من ورا ومن قدام للفكين العلوي والسفلي عشان تلصق اللصقة مزبوط ع أسنانك ، مو ضروري تفرشي أسنانك قبلها بس أهم شي مايكون في بقايا أكل صغيرة بين الأسنان عشان ماتمنع اللصقة إنها تثبت مكانها ،، وبس تحطي اللصقة بالطريقة الموضحة في العلبة وتستني المدة المكتوبة في طريقة إستعمال النوع اللي بتستخدميه ^^ ،،

طبعاً أنا ما كنت أدري إنها أنواع :|
وأشتريت النوع اللي لقيته قدامي! << متحمسة الأخت!
أول يوم بدأت أجربها صراحة حسيت إنو أطراف أسناني أتغيرت وفتحت وصار لون أسناني بشكل عام أفتح الحمد لله ،،
يعني حسيت إنو سعرها فيها TvT
تاني يوم إستخدام كان مرة مسلي وكماان الحمد لله أسناني فتحت أكتر ،،
الشي اللي كان مريحني إنو مو لازم أستخدمها مدة ٧ أيام ورا بعض ،، ممكن خلاص أوقف إذا حسيت إني راضية بدرجة التبييض اللي حصلت عليها ،، لأني ماكنت أبغا أسناني تكوون مرة داك البياض اللمبة! كنت أبغى لونها يكون أبيض طبيعي يعني مووو مرررة أبييييض! فكنت متحمسة أعرف كيف حتكون النتيجة ..
طبعاً بعد ما شلتها بعد تالت يوم إستخدام ،، حسيت بشي غريب في أسناني !
( طبعاً أنا أسناااني جددددا حساااسة يعني لو أكلت آيسكريم ممكن كل شوية أوقف بسبب الألم الناتج عن برودة الآيسكريم،، والنوع اللي بأستخدمه ماهو للأسنان الحساسة ،، فالغلط مني أنا مو من اللصقات أبداً،، لأنو فيه نوع للأسنان الحساسة بس محدثتكم ماكانت تدري )

الألم اللي حسيت بيه كان خفييف مرة ،، بس مزعج كونه إستمر معايا اليوم كله ،،
ماحيفهمني ويحس بيه إلا صاحبات الأسنان الحساسة ،، لمن تشربي شي بارد ولا تحاولي تكوني شجاعة شوية وتاكلي ثلجة ولا لقمة آيسكريم،، إيش يسير في أسنانك؟
عرفتوه؟ إيوووة هوة دا شعوري في داك الوقت ^^
الموهم،،
قررت أوقف إستخدامها كم يوم ألين ما يروح الألم -اللي ما أستمر يوم كامل الحمد لله- ،، - مع إني لسة ماوصلت لدرجة البياض اللي أبغاها-
والشي اللي عجبني أكتر في اللصقة إني حتى بعد ما تركتها مدة طوييلة -يمكن شهرين تقريباً- لون أسناني ما أتغير مرة
ولله الحمد،،
رجعت أستخدمها قريب ،، يمكن ع الأسبوع اللي فات ،، بس أترك فاصل يومين تلاتة بين كل إستخدام بسبب إنو أسناني حساسة ،،
والحمد لله دحين فاضلي مغلف واحد بس وأخلص العلبة ،،
طبعاً لو حطينا المدة اللي تركت فيها اللصقات + الفواصل الزمنية اللي أحطها بين كل إستخدام
تكون درجة التبييض اللي حصلت عليها -بالنسبة لية- جداً حلوة ولله الحمد ،،
يعني معطية أسناني بياض منعش !
كيف منعش ريني؟ -ــ-"
يعني أحس اللي يشوف أسناني يحس إنها نظيفة ومنتعشة الحمد لله ^^ مو كفاية؟
غير كدا درجة التبييض اللي حصلت عليها مرضية جداً مقارنة باللعب والخربطة وطريقة الإستخدام اللي خربطتها من عقلي ^^" يعني أتخيل لو مشيت ع الأيام مزبوط وحطيت كل لصقة في وقتها أعتقد حتبهرني اللصقات دي ويمكن نتايجها كانت حتكون أقوى ..
بس عن نفسي أبغا أكون في السليم مع أسناني الحساسة وأمشي معاها بالهداوة شوية ^^"

كانت تجربة جداً ممتعة ولله الحمد ،،
كل ما أفك اللصقة أقعد فاتحة فمي قدام المرايا زي الوحش أتأمل التغيرات وأفرش أسناني وأبتسم لنفسي زي المجنونة ^^
خخخخخ!
بس خرجت من التجربة دي برغبة إني أبغا أرجع أجرب نفس اللصقات بس للأسنان الحساسة بإذن الله ،، وأكيد وقتها حأشارككم تجربتي معاها ^^

أظن إني كتبت كل شيء ،، صح ؟ في شي ناقص؟
لو عندكم أي أسئلة أتفضلوا حياكم أسألوا اللي تبغوه هنا عن طريق تعليق في المدونة أو ع تويتري أو في صفحتي ع الآسك،، كوووول أبوووهم تلاقوهم هنــــــــــــا

أتمنى تكون تجربتي عجبتكم ^^
ترقبوا التدوينة القادمة من محل ريني قريييباً بإذن الله ،،
إلى ذلك الوقت ،،
دمتم في أمان الكريم.

37 comments:

  1. وبفضل الله تعالى .. قريت الموضوع ياستي .. ارتحتي بقى ؟؟!! XD .. ع فكرة انا جنوحة بس دخلت بغير معروف لاني نسيت كلمة المرور حقت قوقل =[

    ReplyDelete
    Replies
    1. وااااه @@!
      منجد نسيتي كلمة المرور! ذكريني أشوفلك هية يسير أصلحها ليكي بإذن الله ^ـ* ع العوموووم،،،

      ليه محسستني إني شحت الكومينت حقك -ــ-" هونتوني كنت أبغاكي تدخلي عشان تستفيدي
      هونتوني شحاتة جاناي ديس T^T
      بس كمان هونتوني أريجاتو ع ردك حتى لو كان تفشيلي خخخخخ ^^ إسمك رديتي وعبرتي شغلي أحسن من ناس كتييير ;\

      يعطيكي العافية جنوحة ومنووورة ياقلبي أتمنى ماتكون آخر مرة بإذن الله !
      ربي يحفظك!

      Delete
    2. السلام عليكم اختي الله يسعدك استخدمتها وطلعت بقعه بيضاء بأسناني!! وش الحل؟ استمر اكمل باقي اللصقات والا لا؟ ردي الله يسعدك

      Delete
    3. والله ي قلبي ماني خبيرة أسنان عشان أحكم ><" أفضل تراجعي دكتورة اسنانك عشان تطمني أحسن ،،

      Delete
  2. كنت محتاجة اقرأ تجربة عنها --شكراااا -اريقاتوو

    ReplyDelete
    Replies
    1. العفو حبيبتي ^^
      دو إيتاشي ماشتيه !
      وشكراً ليكي ع الرد !

      إن شاء الله تكوني استفدتي :)

      Delete
  3. يسلموا ,, تجربتك شجعتني.. رح اوريها لأختي لأني حاليا مركبة تقويم وما بيمشي الحال ^^

    ReplyDelete
    Replies
    1. يسلمك ربي ^^
      طيب الحمد لله تجربتي شجعتك ^^ يسير جربيها بعد ماتفكي التقويم بالسلامة إن شاء الله :))

      نورتِ وإن شاء الله ماتكون آخر مرة <3

      Delete
  4. رديت بس ما أعرف وصل ردي او لا ,, عموما ,, شكرا لمشاركتنا تجربتك ,, شجعتيني =))

    ReplyDelete
    Replies
    1. وصل حبيبتي ولله الحمد ^^
      العفو ياقلبي :) سعيدة إنك أتشجعتي لتجربتها <3

      نورتِ :)

      Delete
  5. بصراحة شرح متكامل.. وباستطاعتي توفير جميع الانواع وباسعار منافسة للسوق

    ReplyDelete
  6. بصراحة شرح متكامل.. وتجربة موفقه.. يتواجد لدي جميع الانواع وباستطاعتي توفير اي طلب من امريكا باسعار تنافسية..

    ReplyDelete
  7. مشكوره لمشاركتنا للتجربه ...انا شريتها وغدا التجربه ان شاءالله

    ReplyDelete
  8. شكرا لكي ...انا اشتريت منها وغدا يساجربها بإذن الله

    ReplyDelete
    Replies
    1. العفو حبيبتي ^^ إن شاء الله تكنوي استفدتي *قلب*
      جربيها وإن شاء الله تعجبك ياقلبي ،،

      منووورة ^*

      Delete
  9. يصير استخدمها بفترة الرتينر *التقويم المتحرك*!

    ReplyDelete
    Replies
    1. عن نفسي لو في فترة الرتيرنر كنت حأستخدمها "بدون ما أكون مركبة الرتيرنر طبعاً"
      بس برضو أسألي دكتورتك إزا حابة تطمني أكتر،
      عن نفسي أشوف مالها أي علاقة بالرتيرنر ^^


      منورة ،، :))

      Delete
  10. يعطيك العافيه ياقمر
    انا كمان طلبت نغس النوع وحجربو
    لكن انا قريب فكيت التقويم ودحين مركبة الثابت من الخلف خ
    هل حيكون فيه ضرر لو حطيت اللصقات عليه احترت القى جوابب

    ReplyDelete
    Replies
    1. ويعطيكيها ي قلبي ،
      أفضِّل تسألي دكتورة أسنانك عزيزتي ^^

      Delete
  11. حبيت أسألكك ! لازم بعد م نشيل اللصقات نفرش أسناننا وللا عايدي ؟

    ReplyDelete
    Replies
    1. عن نفسي كنت أمضمض واغسل اسناني ع الخفيف لانو كانت تتعب بعد اللصقات بحكم انو اسناني حساسة فما كنت ابغا اضغط عليها في التنظيف.

      Delete
  12. وكمان اشكرك ع دا الموضوع ممرا كان نفسي اشوف احد مجرب عشان اقدر اسوي بأمان

    ReplyDelete
    Replies
    1. العفو حبيبتي ^^
      سعيدة انو افادك.

      Delete
  13. لو سمحتي..
    اللصقة تعالج الزوايا بين الأسنان؟
    لأن فيه زوايا صعبة شوي أقصد بين الأسنان..
    أنا لاحظت اصفرار في هاذي الأماكن وودي أعالجه..
    إذا إي إن شا الله أشتري اللصقات لأني محتاجة لهم

    في شي مهم بالنسبة للي يحبون الكوفي وهالسوالف مثلي.. لاازم تتمضمضين بعد ما تشربين الكوفي أو تشربين من وراه مباشرة موية والا بقاياه بتصبغ الأسنان.

    ReplyDelete
    Replies
    1. ما اعتقد اللصقج مصممة للاماكن الضيقة جداً،
      أفضِّل تراجعي دكتورة الاسنان ي قلبي عشان تتخلصي من التصبغات قبل لا تكثر وتسير ازالتها صعبة لاسمح الله .
      وشكراً ع النصيحة :))

      Delete
  14. نص ساعة مكتوب على الكرتون خطأ ساعتين

    ReplyDelete
    Replies
    1. هية انواع، النوع اللي استخدمته كان يستخدم لمدة ساعتين

      Delete
  15. شكرا رينا وموفقة ❤

    ReplyDelete
  16. حبيبتي انا ماكنت اعرف انه اسناني حساسه ف جربت ابو ساعة وجربت كورسين الكورس الثاني اسناني صارت تالمني حتى من الهوا اذا دخل فمي حصل معاك هالشي عشان لا اقلق 😥💔💔💔

    ReplyDelete
    Replies
    1. يب ي قلبي كانت حالتها مرة مضايقتني بعد ما استخدمت اللصقات مرة "زي ماني كاتبة في التدوينة" ، بس ازا الألم استمر معاكي اكتر من يوم أفضل تراجعي دكتورة أسنانك عشان تطمني بس وأفضل توقفي كورس اللصقات شوية ألين ما تهدى اسنانك "نفس اللي عملته أنا" بالتوفيق وسلامتك ماتشوفي شر ^^

      Delete
  17. يعطيك العافيه يارب بس بسالك عن المعجون عادي استخدم اي معجون والا لازم معجون خاص بعدها ؟

    ReplyDelete
    Replies
    1. ويعافيكي ^^
      عن نفسي كنت أستخدم معجون أسناني العادي،،

      Delete
  18. اريقااااااتووووو ريني تشان ويالتوفيق

    ReplyDelete
  19. شريتها وكنت مترددة استخدمها بس تحمست يعد تجربتك مرررة شكرا يعطيكي العافيه

    ReplyDelete
  20. يعطيك العافية بس ياريت لو تفيدينا من وين اخذتيهم وشكرا

    ReplyDelete
  21. يعطيك العافيه بس من وين اخذتيها اختي ؟ وشكرا

    ReplyDelete